فلوس الغربه للشاعر والزجال حسن عبد السلام

فلوس الغربه .. مشمومه..-----. بداء الصرف.. مسمومه

بختم النق .. مختومه..-------. عليها عيون.. بتحسدها

بيركبها.. ميتين عفريت..--------. يفتتها.. عشر فتافيت
...
ويرمى عليها.. عود كبريت.----.. وينفخ فيها.. ويقيدها

ويطلع ليها.. ميت نخرور...----- يقطَع جتتك.. بساطور

بلاوى الدنيا واقفه طابور..------ وجايه... تمدَلك.. ايدها

فلوس الغربه.. منظوره...- ----عليها الحمله.. مسعوره

وحسداها عينين عوره..-.----- بتقضى عليها.. وتبيدها

تلت ترباعها.. مشتريات.. --بدون داعى.. ولا احتياجات

موضات بتروح وتيجى موضات..--- حاتضطرك.. تجددها*

مفيش فى الغربه غير اسواق.. دى هى الفسحة والترياق

وبرضك هىَ .. بيت الداء.... بتشفى الناس.. وتمرضها!!

بترجع شايل الهدايات... -------عاملَك ليسته.. بالميَات

جيران_ اصحاب غير الاخوات... مصيبتك.. تلقى واحد مات

تروح اجبارى .. للمعاشات..------. تزور الورثه.. تسندها*

يا ريت بقى كل ده وعاجبين... جميع الناس بقم.. ملاعين

يكيدولك..بقى بتفانين...---- ولجميلك... بقم .. ناسيين

يرصوا فى سكتك تعابيين.------.. افاعى.. صعب ترويدها

عدوك لما يشتموا فيك... ما فيش فى القلب غير تلاكيك

ولا واحد.. يرحب بيك...---- ما خلصت جاريه من سيدها

نهايه الخيبه بعد غياب.------.. فلافل مصر .. تبقى كباب

ماعادشى رصيد فى أى حساب... فاتوره.. وراح تسددها

طب اغلط مره قول معييش... حاتلقى الضرب بالشواكيش

دى ناس شغلتها نتف الريش...اعادى..صعب.. تحديدها

ومين ده اللى .. ضرب ايدك..-----. كلام يوجع.. وبيكيدك

ماعادشى هدايا هتفيدك... خلاص الكعكه.. راح عيدها

فلوس الغربه و اهى راحت..---.وناس كبرت وناس زاغت

وليمه.. وبح واتشالت... --------ولا فى الحلم هتعيدها!!*

الشاعر والزجال حسن عبد السلام